Раштав уйăхĕн 8-мĕшĕнче Орининти вăтам шкулта 5 тата 9 классенче вĕренекенсем онлайн мелĕпе ирттернĕ «Тăван çĕр-шыв паттăрĕсем – пирĕн вăхăтри паттăрсем» çавра сĕтеле хутшăнчĕç. Çавра сĕтеле раштав уйăхĕн 9-мĕшĕнче Раççейре паллă тăвакан Тăван çĕр-шыв паттăрĕсен кунне  халалларĕç. Ку мероприятие Муркаш районĕнчи чылай шкул хутшăнчĕ.  Ăна  Мускаври коопераци институчĕн Шупашкарти филиалĕ йĕркеленĕ. Çавра сĕтеле ертсе пыма пĕрремĕш курс студентне Антон Ластухина шаннă. Тухса калаçакансем хушшинче институтăн ректорĕ Валерий Андреев, юридици факультечĕн иккĕмĕш курс студенчĕ Дмитрий Сыбатов, республикăри ветерансен канашĕн ертÿçи Генрих Васильев, ЧКИ колледжĕн студенчĕ Дмитрий Афанасьев тата Раççей Геройĕ Евгений Борисов пулчĕç.

  Ачасене ку мероприятире хутшăнни нумай усă пачĕ. Вĕсем çак уява хăçан уявлама пуçлани çинчен, Совет Союзĕн Геройĕ ята тăван Чăваш енрен миçе çын илни çинчен, паянхи кун миçе Герой пурăнни çинчен пĕлчĕç. Чи кăсăкли вара ачасемшĕн çавра сĕтелре пирĕн Муркаш районĕнчи Тивĕш ялĕнче çуралса ÿснĕ, 19 çултах Раççей Геройĕ ята илнĕ Евгений Германович Борисовпа инçет мелпе тĕл пулни. Ачасем геройпа куçа-куçăн тĕл пулма хатĕррине те хаваспах пелтерчĕç. Муркаш паттăрĕн кашни сăмахне куç сиктермесĕр итлесе, унăн аса илĕвĕн  кашни самантне куç умне кăларса пăшăрханчĕç. Темле йывăр пулсан тăван ене çитсе тăван аннене эпĕ çитрĕм тесе пĕлтересси  хавхалантарчĕ тесе палăртрĕ Евгений Борисов.